Կաշառակեր դասախոսները չեն կարող դառնալ բարձրագույն դատական խորհրդի անդամ. «Ելք»-ը հնարավոր է թեկնածու առաջադրի

Ինչպես հայտնի է, նոր Սահմանադրության համաձայն, ներկայիս արդարադատության խորհրդին փոխարինելու է գալիս բարձրագույն դատական խորհուրդը։ Հենց այս նոր կառույցն է լինելու դատական համակարգի ղեկավար մարմինը՝ ավելի ընդարձակ լիազորություններով: Խորհուրդը կազմված է լինելու 10 անդամից, որոնցից 5-ը լինելու են դատավորներ, 5-ը՝ գիտնականներ։

ԱԺ «Ելք» խմբակցության պատգամավոր, իրավաբան Էդմոն Մարուքյանը «Առաջին լրատվական»-ի հետ զրույցում նշեց, որ բարձրագույն դատական խորհուրդը իր ինստիտուցիոնալ ձևով տարբերվելու է արդարադատության խորհրդից։ Այս նոր կառույցի անկախության երաշխիքներն ավելի շատ են, հետևաբար, շատ ուշադիր պետք է հետևել, որպեսզի նոր կառույցի անդամները ճիշտ մարդիկ ընտրվեն։ «Բացի Դատական օրենսգրքով սահմանված չափանիշների, պետք է ուշադիր լինել, որ այնպիսի դատավորներ, այնպիսի անդամներ չներկայացնեն, որոնք այս կամ այն կերպ աչքի են ընկել։ Օրինակ՝ պետք է ուշադիր լինել, որ բարձրագույն դատական խորհրդի անդամ չդառնան այնպիսի թեկնածուներ, որոնք տարբեր հնչեղ, քաղաքական գործերով են անցել, հայտնի են իրենց կայացրած ապօրինի որոշումներով, հայտնի են որպես փաստաբանների իրավունքները ոտնահարող դատավորներ, կամ դատավոր լինելով հանդերձ՝ օլիգարխներ են իրենց հայտարարագրերով։ Անպայման պետք է ուշադիր լինել, որ այդպիսի թեկնածուներ չառաջադրվեն»,- ասաց Մարուքյանը։

Ինչ վերաբերում է բարձրագույն դատական խորհրդի մյուս հինգ՝ իրավաբան-գիտնական թեկնածուներին, ապա, մեր զրուցակցի խոսքերով, այս հարցում պետք է էլ ավելի ուշադիր լինել, քանի որ կարող են առաջադրվել այնպիսի դոկտոր-պրոֆեսոր դասախոսներ, որոնք, օրինակ, համալսարաններում կամ ակադեմիական շրջանակներում հայտնի են որպես ռիսկային։ Այլ կերպ ասած՝ հայտնի են որպես կաշառակեր դասախոսներ։ «Պետք է ուշադիր լինել, որ հանկարծ այդպիսի դասախոսի, գիտնականի թեկնածություն չառաջադրվի։ Չառաջադրվեն այնպիսի դասախոս-գիտնականներ, ովքեր իրավաբանականի ուսանողների հետ փողով պարապում են, որպեսզի հետագայում այդ ուսանողի ստուգարքը կամ քննությունը նշանակեն։ Այստեղ հստակ շահերի բախում կա՝ փողով պարապում են ուսանողների հետ, որ հետո նրանց քննությունը նշանակեն։ Այսպիսի արատավոր պրակտիկա ունենք մենք իրավաբանական բուհերում։ Դրա համար էլ պետք է հետևողական լինել, որ այդ փողով պարապող մարդիկ չհայտնվեն բարձրագույն դատական խորհրդում։ Մարդը, որ փողով պարապում է ուսանողի հետ, որ հետո նրա քննությունը նշանակի, ապա նրա ներկայությունը բարձրագույն դատական խորհրդում աբսուրդ կլինի»,- նշեց Մարուքյանը։

Ի դեպ, Մարուքյանը նշեց, որ իրենք ևս քննարկում են «Ելք» խմբակցության կողմից իրավաբան-գիտնական թեկնածու առաջադրել դատական խորհրդի համար։

Լուսանկարը՝ panorama.am-ի

Աղբյուր՝ 1in.am

Բաժին: featured, Հարցազրույցներ, Մամուլ