Հարյուր տարի լացում ենք, սակայն Ցեղասպանության հարցում կոնկրետ գործողություններ քիչ ենք անում. Էդմոն Մարուքյան

Հարյուր տարի մենք լացում ենք, սակայն կոնկրետ գործողություններ քիչ ենք անում, կամ անջատ ենք անում: Այս մասին Tert.am-ի հետ զրույցում ասաց ԱԺ անկախ պատգամավոր Էդմոն Մարուքյանը՝ անդրադառնալով Հայոց ցեղասպանության հարյուրերորդ տարելիցին։
«Պետությունն առանձին իր գործառույթներն ունի, սակայն միշտ չէ, որ պետությունը պետք է խնդիրներ բարձրացնի, որը որ այդ պահին հնարավոր է միջազգային հարաբերություններում որոշակի հարաբերություններ փչացնի: Դրա համար կան կազմակերպություններ, որոնք հենց արևմտահայությանն են ներկայացնում և նրանց խախտված իրավունքների հարցերն են բարձրացնում»,-ասաց պատգամավորը և նշեց, որ շատ լավ կլինի, որ այդպիսի կազմակերպություններն իրավական ճանապարհով իրենց խնդիրները բարձրացնեն, այսինքն` Թուրքիայի ներպետական դատական ատյաններում հայցեր հարուցեն և ամեն մեկն իր հողը, իր պապի տունը, գումարները պահանջի:

 

«Ես այնքան միամիտ չեմ, որ ասեմ, որ եթե այդ պահանջները ներկայացվեն, թուրքական դատարանները կբավարարեն, սակայն դա սկիզբն է: Այսինքն՝ այդ մեխանիզմները օգտագործելով՝ նրանք կարող են սպառել թուրքական դատական ատյանները և հասնել մարդու իրավունքների եվրոպական դատարան: Այսօր կան բազմաթիվ որոշումներ Կիպրոսի, հունական գործերով, երբ ընդդեմ Թուրքիայի որոշումներ են կայացրել»,-ասաց Էդմոն Մարուքյանը և նշեց, որ կարևոր է այն փաստը, երբ արձանագրվում է, թե գույքը բռնագանձվել է, մարդիկ սպանվել են:
Ըստ նրա`Հայաստանը որպես պետություն պետք է ոչ թե համակարգի այդ գործողությունները, այլ աջակցի դրանց: «Հայաստանը, որպես պետություն, նշված խնդիրները կարող է բարձրացնել ՄԱԿ-ում, սակայն բարձրացվելու ձևերը պետք է տարբերվեն կազմակերպությունների բարձրացման ձևերից»,-ասաց նա և նշեց, որ մենք հարյուր տարի շարունակ այդ ուղղությամբ բան չենք արել:
Պատգամավորը գտնում է, որ բաներ կան, որ պետք է միասնական պահանջել, բաներ կան, որ՝ ոչ, քանի որ հիմա, եթե Հայաստանը բանակցություններ է վարում Թուրքիայի հետ սահմանը բացելու համար, եթե նման խնդիրներ բարձրացնի, այդ բանակցությունները կարող են արդյունքի չհասնել: «Թող սահմանը բացվի, դիվանագիտական հարաբերություններ լինեն, մյուս կողմից էլ նմանատիպ կազմակերպությունները պահանջեն իրենց իրավունքները»,-ասաց նա:
Անդրադառնալով հայ-թուրքական արձանագրություններին՝ պատգամավորն ասաց, թե միջազգային հանրությունը որևէ կերպ չկարողացավ Թուրքիայի վրա ազդեցություն ունենալ, ճնշել, որ այդ արձանագրությունները վավերացվեն:

Աղբյուր՝ tert.am

Բաժին: Մամուլ