«Չեմ կարծում, թե հեշտ է ինձ ճնշելը»

-Պարոն Մարուքյան, Դուք չեք մասնակցում ընդդիմության դաշտում տեղի ունեցող գործընթացներին, իշխանությունում էլ չեք: Հնարավո՞ր է այս վիճակում լինել անկախ: Որտե՞ղ է Ձեր տեղը:
-Ես իմ տեղում եմ, դա շատ լավ տեղ է: Բազմաթիվ մարդիկ նախանձում են, որ կարող էին լինել իմ տեղում, բայց այնտեղ չեն: Ինչ վերաբերում է «հնարավորին», քաղաքականությունը հնարավորինի արվեստ է: Իմ ունեցած հնարավորությունների շրջանակում ես անում եմ ամենահնարավորը, մասնավորապես իմ ընտրատարածքի մարդկանց և օրենսդրական դաշտի համար: Իմ առաքելությունը սրա մեջ եմ տեսնում: Քաղաքական գործընթացներին նայում եմ դիտորդի կարգավիճակով: Եթե ժամանակ գա, որ ես պիտի ընտրեմ, թե որտեղ պիտի լինեմ, հաստատ իմ տեղը գտնելու եմ:
-Ձեզ ավելի հոգեհարազատ է այսօրվա ընդդիմությա՞ն, այլընտրանքի՞, թե՞ իշխանության գործելաոճը:
-Ես ավելի շատ արևմտյան ուղղվածության կողմնակից եմ: Արևմուտքում գոյություն ունեն ընդդիմություն և իշխանություն, ուրիշ բան չկա: Ակնհայտ է, եթե ես իշխանական ուժերի մեջ ընդգրկված չեմ, մյուս դաշտում եմ:
-Դուք լավ աշխատում եք նաև իշխանության հետ:
-Այո, որովհետև ես աշխատում եմ լուծել այն խնդիրները, որոնք իմ առջև դրել են իմ ընտրատարածքի ընտրողները, և այդ ճանապարհին, բնականաբար, պիտի համագործակցեմ բոլոր ուժերի հետ, որպեսզի հասնեմ ցանկալի արդյունքի: Ակնհայտ է, չէ՞, որ որևէ նախագիծ չեմ կարող խորհրդարանում անցկացնել, առանց գոնե 65 ձայնի: Պետք է, չէ՞, համագործակցեմ, բանակցեմ, համոզեմ: Ինձ համար էական չէ, թե ովքեր կողմ կքվեարկեն այդ նախագծերին, կարևորը, որ դրանք ընդունվեն:
-Նախորդ գումարումների ԱԺ-ում բոլոր անկախ պատգամավորները, ի վերջո, դարձել են այս կամ այն, հիմնականում իշխող կուսակցության խմբակցության անդամներ: Ձեզ վրա այդ առումով դեռ ճնշումներ չկա՞ն:
-Ես ինձ կայացած մարդ եմ համարում և չեմ կարծում, թե հեշտ է ինձ ճնշելը: Ինչ վերաբերում է Ձեր նշած փորձին, ակնհայտ է, որ ժամանակը հոսում է, և մարդիկ, ըստ էության, կողմնորոշվում են: Չորրորդ գումարման ԱԺ-ում ունեցել ենք տասը անկախ պատգամավոր, դրանց մի մասը մեկ խմբակցությունում է, մյուսը` այլ: Սա նորմալ է: Քաղաքական գործունեության մեջ մարդիկ գտնում են այն ուժերը, որոնք իրենց հոգեհարազատ և իրենց ծրագրերին համահունչ են ու անդամակցում են դրանց:
-Ձեր պարագայում էլ չբացառե՞նք, որ ինչ-որ պահի կգա այդ «ժամանակը»:
-Իհարկե, ի վերջո քաղաքական գործունեությունը նաև թիմային աշխատանք է: Դեռ որևէ մեկը միայնակ կամ հինգհոգանոց խմբակցությամբ մեծ խնդիրներ չի լուծել: Ցանկացած նախագիծ անցկացնելիս և՛ ես, և՛ փոքր խմբակցությունները նույն վիճակում ենք հայտնվում, պիտի համոզենք մեծամասնությանը: «Պառլամենտ-մոնիթորինգի» տվյալներով, ես գրեթե հավասար ցուցանիշներ ունեմ, ինչ հինգ-վեցհոգանոց խմբակցությունները: Մարդուց և գործի արդյունավետությունից է կախված:
-Ձեզ պես «արդյունավետ» պատգամավորներ շա՞տ կան:
-Այո, շատ կան պատգամավորներ, որոնք զբաղվում են պրոֆեսիոնալ գործունեությամբ: Չնայած հանրության մեջ տպավորություն կա, թե այստեղ բոլորը գործարարներ են: Այդպես չէ, կան այդպիսիները, բայց գերակշիռ մասը գործարար չէ:

Ճեպազրույցը`
Ռուզան ԽԱՉԱՏՐՅԱՆԻ

Աղբյուր՝ irates.am

Բաժին: Հարցազրույցներ, Մամուլ