Վանաձորի «Քիմպրոմի» աշխատակիցները պահանջում էին չվճարված աշխատավարձը

Բացի աշխատավարձերի պարտքերից, նախագահի խորհրդական Արմեն Մովսիսյանի խոսքով, «Քիմպրոմը» մոտ 40 միլիոն դոլարի գազի, էլեկտրաէներգիայի և այլ պարտքեր է կուտակել:

«Վանաձոր Քիմպրոմ» ՓԲԸ աշխատակիցները վաղ առավոտից Լոռու մարզպետարանի դիմաց հերթական բողոքի ցույցն էին անում՝ պահանջելով մի քանի ամիսվա աշխատավարձը: Ավելի վաղ իրենց բողոքի ցույցերի արդյունքում երկու անգամ ստացել են մեկական ամսվա աշխատավարձ:

«8 ամսով, 9 ամսով աշխատավարձ չեն ստացել: Իսկ իրենք որ մի օր ռեստորան չգնան, ո՞նց կապրեն», – ասաց աշխատակիցներից մեկը:

Աշխատողները պահանջում էին հանդիպում վարչապետի հետ, որպեսզի վերջինս հստակեցում մտցնի, թե ինչ է լինելու «Քիմպրոմի» ապագան և իրենց հետագա կարգավիճակը: Անորոշ է նաև «Քիմպրոմի» սեփականատիրոջ հարցը․ աշխատակիցները չգիտեն, թե ով է գործարանի սեփականատերը, հետևաբար, չգիտեն, թե ում պետք է դիմել:

«Մենք հանդիպում ենք պահանջելու նաև նախագահի հետ: Թող ասեն՝ ով ա սեփականատերը, որպեսզի մենք նրան դիմենք: Ես չգիտեմ՝ էս ինչ օրենքներ են, ինչպե՞ս է եղել, որ գործարանը սեփականատեր ունի, բայց չգիտենք՝ ով ա: Մեզ չեն ասում», – դժգոհեց «Քիմպրոմի» աշխատակիցը:

Գործարանի աշխատողներին պետական մարմինները բազմիցս են առաջարկել իրենց խնդիրները լուծել դատական կարգով, սակայն, ըստ գործարանի աշխատակիցների՝ դա խնդրի լուծման լավագույն տարբերակը չէ, քանի որ դատական գործերը մշտապես ձգձգվում են:

Աշխատակիցների հետ հանդիպման եկած ԱԺ պատգամավոր Էդմոն Մարուքյանի կարծիքով, «Քիմպրոմի» հետագա գործունեությունը կասկածի տակ է: Դրա վերագործարկման մասին լուրերը, ըստ ԱԺ պատգամավորի, հավատ չեն ներշնչում: Մարուքյանը խոստացավ հավաքվածներին, որ կմիջնորդի վարչապետին, որպեսզի վերջինս ընդունի գործարանի մի խումբ աշխատակիցների:

Բողոքող աշխատակիցները նաև պահանջում էին, որ Էներգետիկայի և բնական պաշարների նախկին նախարար, այժմ՝ նախագահի խորհրդական Արմեն Մովսիսյանը իրենց հետ հանդիպման գա, քանի որ  համոզված են, որ Մովսիսյանից կստանան իրենց հուզող հարցերի պատասխանները:

Այսօր վերջապես Մովսիսյանը ժամանեց Վանաձոր, սակայն հանդիպեց ընդամենը 10 աշխատողների հետ, այն էլ` փակ դռների հետևում: Երկար սպասված հանդիպումից հետո աշխատակիցներից Հրաչիկ Մարտիրոսյանը լրագրողների հետ զրույցում ասաց, որ իրենց խոստացան մինչև օգոստոսի 10-ը ևս մեկ ամսվա աշխատավարձ վճարել: Մարտիրոսյանը փոխանցեց նաև, որ խոսել են գործարանի առանձին արտադրամասերի վերագործարկման մասին, որից հետո միայն կարող են լուծել մնացած աշխատավարձերի խնդիրը:

Երկար բանակցություններից հետո Արմեն Մովսիսյանը պատասխանեց նաև լրագրողների հարցերին: Նախագահի խորհրդականը, մասնավորապես, նշեց, որ «Քիմպրոմի» սեփականատերը ինչ-որ ռուսական ընկերություն է՝ հավելելով, որ չպետք է թույլ տալ, որպեսզի գործարանը սնանկության հասնի: Նա ասաց, թե այս պահին ուսումնասիրություններ են կատարվում «Քիմպրոմը» վերագործարկելու համար:

Աղբյուր՝ azatutyun.am

Բաժին: Մամուլ, Տեսանյութեր