14 հեռուստաընկերություններ կփակվե՞ն

Տեղյակ լինելով մարզային հեռուստաընկերությունների թվայնացման հետ կապված խնդիրներին՝ ՀՀ ԱԺ պատգամավոր Էդմոն Մարուքյանը դիմել է կառավարությանը գրավոր հարցապնդմամբ ու բարձրացրել այն խնդիրը, որ այդ տարիներ շարունակ աշխատել են ու ձևավորել կայուն լսարան:

Միանգամից 14 հեռուստաընկերությունների փակմամբ առնվազն մի քանի հարյուր հոգի կհայտնվեն գործազուրկի կարգավիճակում: Ավելին, հաշվի առնելով այն, որ այդ անձիք մասնագիտացած են տվյալ ոլորտում, իսկ մարզերում այլևս համապատասխան աշխատանք գտնելը գրեթե անհնարին է լինելու, ապա ակնհայտ է, որ նրանք, չգտնելով գոնե մասնագիտությանն ու մասնագիտացմանը համապատասխան աշխատանք, բռնելու են արտագաղթի ճանապարհը: Եթե նախատեսվածի համաձայն յուրաքանչյուր մարզում գործի միայն 1 հեռուստաընկերություն, ապա փաստորեն իսպառ վերանալու է մրցակցությունը, որը ոլորտի զարգացման շարժիչ ուժն է: Նույնկերպ տուժելու է եթերի բազմազանությունը: Այսպիսով, ընդամենը 8 ամիս անց մարզերում հեռարձակվող հեռուստաալիքների թիվը միանգամից կտրուկ նվազելու է՝ այն դեպքում, երբ մարզերում աղքատությունն անհամեմատ ավելի է իրեն զգացնել տալիս, ու մարզերի բնակչության մի ստվար զանգված ֆինանսական անգամ ամենասուղ հնարավորությունը չունի օգտվելու հեռուստատեսությանն այլընտրանք համարվող ինտերնետից՝ որպես տեղեկատվության աղբյուր և ժամանցի կազմակերպման միջոց:Հաշվի առնելով վերոշարադրյալը՝ Մարուքյանը խնդրում է հայտնել, թե արդյո՞ք կառավարությունը մտադիր է որևէ կերպ աջակցել քննարկվող խնդրի լուծմանը և «Հեռուստատեսության և ռադիոյի մասին» ՀՀ օրենքում միջանկյալ լուծման տեսքով խորհրդարանին առաջարկել երկարաձգել անալոգային լիցենզիաների գործողության ժամկետը մինչև խնդրին կտրվի համակարգային լուծում:

Աղբյուր՝ mitk.am

Բաժին: featured, Մամուլ