ԵՏՄ-ի այլընտրանքը Եվրամիության հետ ասոցացումն է. Մարուքյանը հակադարձում է Շարմազանովին

«Ես կարծում եմ՝ Շարմազանովը շատ լավ գիտի, թե որն է եղել և կա Եվրասիական տնտեսական միության այլընտրանքը, և այդ այլընտրանքը արձանագրված է նաև «Ելք» դաշինքի ծրագրային դրույթներում, որ հաջողության հասնելու պարագայում պետք է վերսկսեին բանակցությունները Ասոցացման համաձայնագրի ստորագրման շուրջ»,- «Առաջին լրատվական»-ի հետ զրույցում անդրադառնալով ՀՀԿ խոսնակ Էդուարդ Շարմազանովի դիտարկումներին՝ ասաց ԱԺ «Ելք» խմբակցության պատգամավոր Էդմոն Մարուքյանը:

Նշենք, որ Շարմազանովը, անդրադառնալով «Ելք» դաշինքի՝ ԵՏՄ-ից դուրս գալու գործընթաց սկսելուն, նկատել էր. «Եթե կան քաղաքական ուժեր, ովքեր ԵՏՄ-ից դուրս գալու կոչեր են անում, ավելի լավ կլինի ոչ թե զգացմունքային հարթության վրա խոսեն, այլ կոնկրետ այլընտրանք առաջարկեն և փաստեր։ Մենք երբ որ որոշում ենք կայացրել անդամակցել ԵՏՄ-ին, հստակ հաշվարկներ ենք կատարել, թե ինչ կշահի մեր գյուղացին, ինչ կշահի մեր ներդրողը, ինչ կշահեն տուրիզմը, տնտեսությունը»,- երեկ Հանրապետականի Գործադիր մարմնի նիստից հետո լրագրողների հետ զրույցում ասաց Շարմազանովը՝ նշելով, որ Հայաստանը միացել է 170 միլիոնանոց շուկային։

«Համեմատությունը, թե ԵՏՄ-ին անդամակցելով՝ 170 միլիոնանոց շուկա ենք ձեռք բերել, որևէ կերպ տեղին չէ, քանի որ դրա այլընտրանը 500 միլիոնանոց շուկան է, դրա այլընտրանքը Հայաստան եկող ներդրումներն էին, որոնք կարող էին Հայաստան գալ միայն այն պարագայում, երբ այստեղ իսկապես ներդրումներ կատարելու աուրա, միջավայր ստեղծվեր Ասոցացման պայմանագրի վավերացումից հետո: Այլընտրանքը այն կարող էր լինել, որ Հայաստանում բազմաֆունկցիոնալ և բազմավեկտոր բարեփոխումներ կարող էին կատարվել դրա ադյունքում, և այնպիսի ստանդարտացման մեխանիզմներ էին Հայաստանում ներդրվելու, որ մեր ապրանքների ստանդարտները բարձրացվելու էին: Դրանից հետո մեզ համար եվրոպական 500 միլիոնանոց շուկան բաց էր լինելու: Այդ պարագայում մենք կարող էինք մեր ապրանքները արտահանել այն երկրներ, որոնք միշտ արտահանել էինք՝ ՌԴ կամ ԱՊՀ երկրներ»,- ասաց Մարուքյանը:

Նա հավելեց. «Պարոն Շարմազանովը երևի մոռացել է, որ մինչև եվրասիական համաձայնագրի ստորագրումը Հայաստանը ուներ ազատ առևտրի համաձայնագրեր ԱՊՀ երկրների հետ, այդ թվում՝ ՌԴ-ի հետ: Այդ առումով ԵՏՄ-ի անայլընտրանք լինելը զարմանալի է, որ փորձ է արվում ներկայացնել իշխանության ներկայացուցիչների կողմից»:

Մարուքյանի խոսքով՝ զարմանալի է նաև, թե ինչն է ԵՏՄ-ի գովելին, երբ հենց հիմա ապրանքների արտահանման հետ կապված սահմանափակումներ և խնդիրներ ունենք, ապրանքները այնտեղ կրկնակի փորձաքննության են ենթարկվում, ինչը հակասում է Եվրասիական տնտեսական համաձայնագրին, վարորդների խնդիրը բոլորին է հայտնի, դեպորտացիայի խնդիր կա, ֆինանսական շուկաների հետ կապված խնդիրներ կան: Պարոն Շարմազանովը հավանաբար կրկին մոռացել է, որ մենք ժամկետներ ունենք վերցրած, և 2020 թվականից հետո մեքենաների ներմուծման և տասնյակ հազարավոր այլ ապրանքների ներմուծման հետ կապված լուրջ թանկացումներ են լինելու, որի պարագայում ՀՀ քաղաքացիները միանշանակ տուժելու են»,- ընդգծեց Մարուքյանը:

Նշենք, որ որպես ԵՏՄ-ի առավելություն Շարմազանովը նշել էր, որ ԵՏՄ-ին անդամակցելուց հետո մինչև 30 տոկոս ավելացել է զբոսաշրջիկների թիվը։ «Մենք չպետք է կատարենք քաղաքական լոկ հայտարարություններ՝ առանց լուրջ հիմնավորումների»,- ասել էր ԱԺ փոխնախագահը։

«Ես չեմ հասկանում՝ զբոսաշրջությունը ինչ կապ ունի ԵՏՄ-ի հետ: Եթե ռուս տուրիստներին նկատի ունեն, ապա դա ԵՏՄ-ի հետ ոչ մի կապ չունի: Մենք Ռուսաստանի համար քայլ ենք կատարել և թույլ ենք տվել ներքին անձնագրերով գալ Հայաստան: Ավելին, ես պարոն Շարմազանովին կհորդորեմ նայել Վրաստանի տուրիզմի թվերին: Դրանք անհամեմատելի են Հայաստանի թվերի հետ: Բազմաթիվ այլ օրինակներ կան: Այնպես որ՝ մեզ համար միշտ այլընտրանք կա, ելք կա»,- եզրափակեց Էդմոն Մարուքյանը:

Աղբյուր՝ 1in.am

Բաժին: featured, Հարցազրույցներ, Մամուլ