Արտակ Զեյնալյանին Նախագահի թեկնածու առաջադրելով մենք ցույց ենք տալիս մեր տեսակը, իսկ սա տեսակների պայքար է. Էդմոն Մարուքյան

Tert.am–ի հետ զրույցում «Ելք» խմբակցության պատգամավոր Էդմոն Մարուքյանն անդրադառնում է Արտակ Զեյնալյանի ՀՀ նախագահի պաշտոնում առաջադրելուն: Հարցին, թե եթե ակնհայտ է, որ անհրաժեշտ ձայներ չեն հերիքելու, ինչու են առաջադրելու, Էդմոն Մարուքյանը պատասխանեց` ցանկանում են ցույց տալ, որ եթե «Ելք» դաշինքն ընտրություններին համապատասխան թվով ձայներ հավաքած լիներ, ՀՀ–ն այդպիսի այլընտրանք կունենար։

-Պարո՛ն Մարուքյան, «Ելք» խմբակցությունը ՀՀ նախագահի պաշտոնի համար առաջադրել է խմբակցության պատգամավոր Արտակ Զեյնալյանի թեկնածությունը, ինչի համար պետք է բանակցություններ սկսեիք՝«Ծառուկյան» դաշինքի հետ՝ Զեյնալյանի առաջադրման համար անհրաժեշտ՝ պատգամավորների ստորագրություններն ապահովելու համար: Այսուհանդերձ, ակնհայտ է, որ անգամ այդ ստորագրությունները ստանալու դեպքում սա քիչ է Արտակ Զեյնալյանին Նախագահի պաշտոնում տեսնելու համար: Հետևաբար, արդյոք սա ձևական նախաձեռնություն կամ PR չէ՞:

-Չէ, որովհետև մենք ԱԺ մտնելուց հետո միշտ ասել ենք, որ ցույց ենք տալու, որ ելք կա: Կա այլընտրանք:

-Բայց ելք չկա, որովհետև մաթեմատիկորեն անգամ պարզ է, որ չկա:

-Մենք ցույց ենք տալու, որ, օրինակ, եթե «Ելք» դաշինքը ընտրություններին հավաքած լիներ համապատասխան թվով ձայներ, Հայաստանի Հանրապետության քաղաքացիները կունենային այդպիսի այլընտրանքներ: Օրինակ, հիշում եք՝ ԱԺ նախագահի պաշտոնում խմբակցության կողմից առաջադրվել էի ես, և եթե մեր քաղաքացիներն ուզային ունենալ նման ԱԺ նախագահ, ապա դա կանեին ապրիլի 2-ին: Այսինքն՝ ապագայի տեսլականը մենք այսօր կերտում ենք. ցույց ենք տալիս, թե ինչպիսին կարող է լինել ապագայում Հայաստանը: Թե ինչպիսի թեկնածուներ, ինչպիսի համակարգ ենք մենք ներկայացնում:Հետևաբար, որևէ քայլ, որ արվում է, ձևական բնույթ չի կրում: Դրանք քաղաքական քայլեր են…

-Բայց սիմվոլիկ, փաստորեն:

-Չէի ասի՝ սիմվոլիկ, որովհետև եթե սիմվոլիկ է, որևէ քաղաքական պրոցեսի վրա ազդեցություն չպետք է ունենա: Բայց վստահեցնում եմ, որ մեր ցանկացած քայլ Հայաստանի քաղաքական պրոցեսի վրա ազդեցություն ունի: Հենց հիմա Արտակ Զեյնալյանի՝ ՀՀ նախագահի պաշտոնում առաջադրումն ունի իր ազդեցությունը։ Առաջարկում եմ մեր գործողություններում փնտրեք քաղաքական տրամաբանություն և քաղաքական ազդեցություն: Եվ մեր ողջ աշխատանքն ու ուղերձներն ուղղված են քաղաքացուն: Մեր՝ ԵԱՏՄ-ից դուրս գալու նախաձեռնությունն էլ է ուղղված քաղաքացուն:

-Ափսոս, որ այս բոլոր նախաձեռնություններից երևում է, որ չկա ձայների անհրաժեշտ քանակ:

-Եթե երևում է, որ չկա ձայների անհրաժեշտ քանակ, դա լավ ուղերձ է քաղաքացիների համար: Որ այնպես քվեարկեն, որ լինի անհրաժեշտ ձայների քանակը մյուս անգամ: Այսինքն՝ մենք ցույց ենք տալիս մեր տեսակը։ Սա տեսակների պայքար է:

-Փաստորեն, նույն ճակատագիրը սպասում է վարչապետի թեկնածուին:

-Այս պահին մենք քննարկում էլ չունենք վարչապետի թեկնածուի հետ կապված: Նախագահի ընտրությունները ընթացքի մեջ կլինեն, կավարտվեն, կքննարկենք նաև վարչապետի հարցը:

-Դիմելու էիք «Ծառուկյան» խմբակցությանը` ստորագրություններ ստանալու համար:

-Դեռ չենք դիմել, երկուշաբթի խմբակցության ղեկավարը գրություն կուղարկի խմբակցության ղեկավար Գագիկ Ծառուկյանին և կսկսվեն կոնսուլտացիաները:

-Իսկ դրական առումով սպասելիքներ ունե՞ք:

-Ինչ պատասխան էլ որ լինի, կլինի քաղաքական պատասխան:

-Չե՞ք կարծում, որ կա ավելորդ քաղաքական ռոմանտիկայի տարր, քանի որ Վանաձորի օրինակը ցույց տվեց, որ իշխանություններն իշխանությունը պահելու հարցում թիզ անգամ չի զիջում:

-Իշխանությունը Վանաձորի պարագայում իշխանություն չուներ, իշխանությունը Վանաձորում պահել էր իր իշխանությունը հանցագործության արդյունքում՝ մարդկանց տեռորի և մանդատագողության: Ինչ վերաբերում է մեր խորհրդարանական նախաձեռնություններին, ապա այդտեղ ոչ թե ռոմանտիզմ է, այլ մեր տեսլականի ու մոտեցումների ներկայացումն է: Եթե գնանք այն տրամաբանությամբ, որ եթե ունենք 9 մանդատ և այդ 9 մանդատով պառլամենտում որևէ օրենք չի կարող ընդունվել, ապա պետք է ընդհանրապես չաշխատել:Օրինակ՝ գերմանական ընտրություններն ավարտվել են. և Մարտին Շուլցի սոցիալիստների կուսակցությունը չի հավաքել մեծամասնություն: Ի՞նչ պետք է անի Մարտին Շուլցի կուսակցությունը կամ Շուլցը… կարո՞ղ է գնան կախվեն: Քաղաքականություն է, քաղաքականության մեջ պետք է անել հնարավորը փոփոխությունների հասնելու համար: Ինչը ևս անում ենք:

-Առաջիկայում ԱԺ արտահերթ նիստ է, որում ներառված են կառավարության բազում տարբեր նախագծեր…

-Սա ամենախայտառակ արտահերթն է, որի օրակարգում ներառված են սահմանադրական մի շարք օրենքներ, հարյուրավոր էջերից բաղկացած մայր փաստաթղթեր, որոնք ուղղակի անհնար է արտահերթ ռեժիմով քննարկել։ Սահմանադրական դատարանի մասին օրենք է ուղարկվել, Դատական օրենսգիրք, Քաղաքացիական դատավարության օրենսգիրքը: Դուք պատկերացնո՞ւմ եք՝ դա ինչ է, ոնց է երկուշաբթի պետաիրավական հանձնաժողովն այդ հարցը քննարկելու: Սա խոսում է այն մասին, որ Հայաստանը բնավ խորհրդարանական երկիր չի դարձել.սա խոսում է այն մասին, որ խորհրդարանն արհամարհված է և գործադիր իշխանությունը ճնշում է ԱԺ-ին: Շատ լավ հասկանալով, որ որևէ մեկը չի հասցնի կարդալ, նման մեծ ծավալներով օրենքներ է ուղարկում: Իսկ խորհրդարանն էլ սրանով չի կարողանում վեր կանգնել օրենքներ դակող մարմնից:

tert.am

Բաժին: featured, Հարցազրույցներ, Մամուլ