Ընտրողների հետ խոսե՞լ եք, նրանք ուզո՞ւմ են, որ 100 տոկոսանոց համամասնական լինի. Էդմոն Մարուքյան

ՀՀ Ազգային ժողովի անկախ պատգամավոր Էդմոն Մարուքյանը կարծում է, որ 100 տոկոսանոց համամասնական ընտրակարգի անցումը չի տա բոլոր խնդիրների լուծումը, այս մասին պատգամավորն ասաց Աժ-ում «ՀՀ ընտրական օրենսգիրքը փոփոխության ենթարկելու մասին» ՀՀ Աժ որոշման նախագծի քննարկման ժամանակ:

«Եթե ես լինեի 5 հոգանոց խմբակցության անդամ, ես կխոսեի 10 տոկոսանոց համամասնականի մասին, կասեի, որ դա շատ կարևոր է: Բայց ասել, որ բոլոր պրոբլեմների լուծումը 100 տոկոս համամասնականի մեջ է, այս նախագծում էլ շատ խնդիրներ իդենտիֆիկացվել են, համաձայն եմ: Բայց պրոբլեմների լուծման ձեր ներկայացրած ճանապարհը պրոբլեմների հետ կապ չունի: Փաստարկները, որ բերվում են. օրինակ՝ կուսակցությունների դերի բարձրացում, կուսակցությունների դերը ո՞նց պետք է բարձրանա: Համամասնական ցուցակները մեր երկրում կազմվում են ամենախայտառակ ձևով: Իմ պատգամավոր դառնալու համար հազարավոր մարդիկ իրենց ներդրումն ունեցել են: Ցուցակով ընտրված մարդկանց պատգամավոր դառնալու համար կամ կուսակցական մի փոքր խորհուրդ է որոշում, կամ՝ մի մարդ»,- իր խոսքում ասաց Մարուքյանը: 

Պատգամավորը մի փաստարկ ևս առաջ քաշեց. նա հարց ուղղեց նախագծի հեղինակներին. «Ընտրողների հետ խոսել ե՞ք, նրանք ուզո՞ւմ են, որ 100 տոկոսանոց համամասնական լինի: Ես ում հետ խոսել եմ, ասել են չենք ուզում»,- շեշտեց պատգամավորը:

Աղբյուր՝ araratnews.am

Բաժին: Մամուլ