Եթե Գ. Սահակյանը չմեդալազրկի Ա. Նիկողոսյանին, այդ խարանը հավետ կմնա պետական ինստիտուտների ճակատին. Է. Մարուքյան

11/08/2015

ԱԺ անկախ պատգամավոր Էդմոն Մարուքյանը, ով հանդես էր եկել Հայաստանի` Ռուսաստանի կազմ մտնելու անհրաժեշտության մասին հայտարարած Եվրասիական երիտասարդական խորհրդարանի ներկայացուցիչ Անդրանիկ Նիկողոսյանին ԱԺ պատվո մեդալից զրկելու նախաձեռնությամբ, Tert.am-ի հետ զրույցում անդրադարձավ Նիկողոսյանի պաշտպանների այն մեկնաբանություններին, որ մեր օրենսդրությամբ շնորհման կարգ կա, իսկ զրկելու՝ ոչ, ասաց. «Տեսե՛ք, «ԱԺ կանոնակարգ-օրենքով» ԱԺ նախագահը որոշում է կայացնում՝ տալ մեդալ, ԱԺ նախագահն էլ կարող է որոշել՝ չեղյալ հայտարարել, անվավեր ճանաչել նախորդ որոշումը»:

 

-Պարո՛ն Մարուքյան, Անդրանիկ Նիկողոսյանի կողմնակիցները հայտարարեցին, որ որևէ մեկին մեդալից զրկելու իրավական ընթացակարգ Հայաստանում գոյություն չունի, և, հետևաբար, քանի որ իրավական ընթացակարգ չկա, ինչպե՞ս նրան կարող են զրկել այդ մեդալից:

 

-Պետք է ասեմ, որ հայտնի իրավական սկզբունք կա, որ ով տվել է կոչումը, նա էլ կարող է հետ վերցնել՝ զրկել: Եվ պետք է այդ մարդկանց հիշեցնեմ Հայաստանի երկրորդ նախագահ Ռոբերտ Քոչարյանի հրամանագիրը, որով 2002-ին գեներալ-լեյտենանտ Վաղարշակ Հարությունյանին աստիճանազրկեց գեներալ-լեյտենանտի կոչումից: Եվ բազմաթիվ իրավաբաններ այն ժամանակ պնդում էին, որ Նախագահը նման իրավունք ունի, չնայած նրան, որ նման ընթացակարգ` զրկելու, չկար: Կար տալու, բայց ոչ զրկելու։ Ավելին, դա, եթե չեմ սխալվում, վիճարկվեց նաև դատարաններով ու մնաց նույնը, որոշումը չփոխվեց՝ Նախագահի հրամանագիրն անվավեր չճանաչվեց: Եվ եթե Վաղարշակի պարագայում խոսքը աստիճանազրկման մասին էր, հիմա խոսքը մեդալազրկման մասին է, ինչն էլ նույն ընթացակարգով կարող է արվել:
-Սակայն դա ի՞նչ օրենքներով է կարգավորվում:
-Տեսե՛ք, «ԱԺ կանոնակարգ-օրենքով» ԱԺ նախագահը որոշում է կայացնում՝ տալ մեդալ, ԱԺ նախագահն էլ կարող է որոշել՝ չեղյալ հայտարարել, անվավեր ճանաչել նախորդ որոշումը և մարդուն զրկել այդ պատվից՝ այդ մեդալից: Պարզ, հստակ, շատ պրիմիտիվ գործընթաց է: Եթե կարիք կա, կարող եմ անձամբ դրա նախագիծն էլ պատրաստել, ավելին, եթե որոշեն այդ որոշումը վիճարկել դատարանում, կարող եմ ինքս դատարանում պաշտպանել ԱԺ նախագահի այդ որոշումը, որով Անդրանիկ Նիկողոսյանը կզրկվի պատվո այդ մեդալից: Ավելին, կարող ենք փաստաբաններ ներգրավվել: Այսինքն, եթե ինչ-որ մտավախություններ ունի ԱԺ նախագահը, պատրաստ եմ իմ իրավական գիտելիքները, ներուժը ներդնել այս հարցում:
-Հնչեց նաև, որ բազմակարծություն է, մարդ է՝ կարծիք է հայտնել, որն ունենալու իրավունքն ունի…
-Մենակ այդ չէ, ասում են, որ ժողովուրդն է որոշում, ու ժողովուրդը կարող է որոշել ու Հայաստանը միացնել մեկ այլ պետության։ Ուրեմն, ժողովուրդը նման բան չի կարող որոշել ու էդ ասողները պետք է Սահմանադրությունը ուշադիր կարդան, որովհետև Սահմանադրության 1-ին, 2-րդ և 114-րդ հոդվածները անփոփոխելի են, և որևէ հանրաքվեի միջոցով ժողովուրդը չի կարող նման բան որոշել: Ժողովուրդն արդեն մեկ անգամ՝ Անկախության հռչակագրով, ապա Սահմանադրությամբ որոշել է, որ Հայաստանը ինքնիշխան, ժողովրդավարական, սոցիալական, իրավական պետություն է, ինչը որևէ կերպ հնարավոր չէ փոխել: Ինչ վերաբերում է մեկնաբանություններին, որ այդ նույն անձն ասում է, որ «ի՞նչ եմ ասել որ, կարծիք եմ հայտնել ու ասել, որ ժողովուրդը կորոշի», կրկնում եմ՝ ժողովուրդը նման բան չի կարող որոշել:
Ինչ վերաբերում նրանց մատնանշած «բազմակարծությանը», ապա եթե դա բազմակարծություն է, ուրեմն Ալիևն էլ իր կարծիքն ունի: Բա Ալիևին ինչո՞ւ ենք քննադատում: Ալիևն էլ ուզում է Սևանում թեյ խմի, ուզում է, որ Լեռնային Ղարաբաղը լինի Ադրբեջանի կազմում: Բա Ալիևին ինչո՞ւ ենք քննադատում: Իմ համար ի՞նչ տարբերություն` ո՞ր պետություն կազմ մտցնելու մասին է խոսքը: Եվ ի՞նչ է նշանակում` կարծիք… Հիմա, կարող է մարդ լինի, ասի՝ Հայոց ցեղասպանություն չի եղել: Դա կարծի՞ք է, թե ՞ մենք պետք է այդ կարծիքի համար մարդուն հետապնդենք, քանի որ բազմաթիվ երկրներում Հոլոքոստ հերքելը, որը կարծիք հայտնել է, քրեական հետապնդման է ենթարկվում: Ֆրանսիայում Հայոց ցեղասպանությունը ժխտելու համար քրեական հետապնդում է նախատեսվում: Էդ ո՞նց եղավ, որ երկրներում երկրի ինքնիշխանության դեմ ասվող կարծիքների համար քրեական հետապնդում կա, իսկ այդ կարծիքի համար, որն ուղղված է մեր ինքնիշխանությունը, մեր պետականությունը վերացնելուն, այդ կարծիքը պետք է հանդուրժենք, հանգիստ լսենք:

-ԱԺ նախագահին գրավոր դիմել էիք, որից հետո նա պետք է գրավոր պատասխան ներկայացներ, ստացե՞լ եք:

 

-Գալուստ Սահակյանը արձակուրդում է, և աշխատանքի վերադառնալուց հետո կպատասխանի:

 

-Իսկ Գալուստ Սահակյանից ակնկալիքներ ունե՞ք, որ անվավեր կճանաչի իր որոշումը:

 

-Եթե չճանաչի, ուրեմն այդ խարանը հավիտյան կմնա մեր պետական ինստիտուտների վրա: Ինչ ասեմ… Եթե ես երբևէ հնարավորություն ունենամ նման որոշում անվավեր ճանաչելու, ես ինքս կճանաչեմ:

 

Աղբյուր՝ tert.am

 

Բաժին: Հարցազրույցներ, Մամուլ