«Լուսավոր Հայաստանը» մեղադրեց կառավարությանը գաղափարագողության մեջ

16/04/2019

«Լուսավոր Հայաստան» խմբակցությունը հանդես էր եկել «Զինվորական ծառայության և զինծառայողի կարգավիճակի մասին» և «ՀՀ պաշտպանության ժամանակ զինծառայողների կյանքին կամ առողջությանը պատճառված վնասների հատուցման մասին» օրենքներում փոփոխություններ նախատեսող նախագծով, համաձայն որի առաջարկվում էր զորացրվելուց առաջ համալիր բժշկական փորձաքննության ենթարկել զինծառայողներին: Պատգամավորները պարզաբանում էին, որ հետազոտությունը հարկավոր այն պատճառով, որ եթե պարզվի, որ նրանց մոտ առողջական խնդիրներ են առաջացել զինծառայության հետևանքով, ապա պետությունը պարտավոր է փոխհատուցել այդ ծախսերը։

Ավելի վաղ նախագիծը թե՛ կառավարության կողմից էր բացասական եզրակացություն ստացել, թե՛ Աժ գլխադասային հանձնաժողովում, իսկ այսօր  ԱԺ նիստի ժամանակ բուռն քննարկման առարկա դարձավ:

Ի դեպ, ԼՀԿ պատգամավորները մեղադրեցին կառավարությանը, որ վերջինս գողանում է իրենց գաղափարները՝ նախապես մերժելով այլ հեղինակներին: Ըստ ԼՀԿ խմբակցության անդամ, նախագծի համահեղինակ Տարոն Սիմոնյանի՝ կառավարությունը բացասական եզրակացություն տվեց իրենց նախագծին, սակայն անմիջապես հետո նմանատիպ նախաձեռնություն կառավարության որոշման մակարդակով դրեց շրջանառության մեջ։ Եվ այստեղ ոչ այնքան խնդիրը դրանում է, այլ նրանում, որ իրավունքներ ու պարտավորություններ սահմանող իրավական փաստաթղերը չեն կարող լինել կառավարության որոշման մակարդակով, այլ պետք է լինեն օրենքների մակարդակով:

«Իմ քայլը» խմբակցության անդամ Տիգրան Կարապետյանն էլ արձագանքեց՝ նախագիծը ակտուալ է, բայց դրանում բազմաթիվ խութեր կան և հենց այդ պատճառով է կառավարությունը որոշել որոշման մակարդակով անցկացնել: Մեղադրանքի մասով էլ արձագանքեց՝ հեղինակային իրավունքի ոչ մի խնդիր էլ չկա, քանի որ  «հարցը ՀՀ պաշտպանությանն է վերաբերում»:

Իր դժգոհությունն արտահայտեց նաև ԼՀԿ խմբակցության ղեկավար Էդմոն Մարուքյանը՝ կոչ անելով կառավարությանը չմոռանալ հիշատակել, թե ովքեր են այս կամ այն նախագծերի հեղինակները: ԱԺ նախագահ Արարատ Միրզոյանն էլ իր հերթին հորդորեց կառավարությանը այդ բացթողումը շտկել:

16.04.2019

Աղբյուրը՝ verelq.am

 

Բաժին: featured, Հարցազրույցներ