Նախագծերը ծանոթով են դրվում քննարկման. Է. Մարուքյանի դժգոհությունն ու ԱԺ նախագահի առաջարկը

ՀՀ ԱԺ հինգերորդ գումարման իններորդ նստաշրջանը մեկնարկեց պատգամավորների դժգոհություններով: ԱԺ նախագահ Գալուստ Սահակյանը ներկայացրեց նիստերի օրակարգը, որից հետո հարցեր տալու համար հերթագրվեց, ապա  իր  դժգոհությունը հայտնեց անկախ պատգամավոր Էդմոն Մարուքյանը:

«2012թ-ից սկսած օրակարգում ունեմ ընդգրկված 15 նախագիծ,  և այդ նախագծերը չեն դրվում քննարկման: Կարծում եմ՝ եթե ունենք սահմանադրական իրավունք նախաձեռնելու, բայց դրանք չեն քննարկվում, ստացվում է, որ մեր սահմանադրական իրավունքը պատրանքային է, չի իրացվում»,- իր վրդովմունքը հայտնեց պարոն Մարուքյանը՝ խնդրելով իր նախագծերը քննարկման առարկա դարձնել:

«Տպավորություն է, որ ծանոթով են նախագծերը դրվում քննարկման»,- ասաց պատգամավորը:

Էդմոն Մարուքյանն ասաց, որ իր ներկայացրած նախագծերից հետո բազմաթիվ նախագծեր են բերվել, որոնք դրվել են քննարկման, բայց իր բերած նախագծերը, որոնք կարևոր հարցերի են առնչվում, չեն քննարկվում:

«Հումորի համար ասեմ՝ ծանոթ ճարեք»,- արձագանքեց ԱԺ նախագահը:

Նա ասաց նաև, որ այդպիսի մոտ 60-70 նախագծեր կան, և եթե ցանկությունը մեծ է, որ բոլորը քննարկվեն, ապա առաջարկեց աշխատել ավելի ինտենսիվ: Ապա հանդես եկավ եւս մեկ օրիգինալ առաջարկությամբ. «Առաջարկում եմ ԱԺ ամբիոնը քաղաքական չդարձնել»:

Գալուստ Սահակյանի խոսքով՝ հնարավոր է , որ դրա հետ կապված փոփոխություն լինի նաև «ԱԺ կանոնակարգ» օրենքում:

Շողիկ Գալստյան

Աղբյուր՝ araratnews.am

Բաժին: featured, Մամուլ